![malad student suicide](https://www.saamana.com/wp-content/uploads/2024/07/malad-student-suicide-696x447.jpg)
अभ्यासाच्या तणावातून एमबीएच्या विद्यार्थ्याने राहत्या इमारतीच्या सातव्या मजल्यावरुन उडी घेत आत्महत्या केल्याची घटना मालाडमध्ये घडली. ध्रुविल व्होरा असे मयत विद्यार्थ्याचे नाव आहे. मालाड पोलिसांनी अकस्मात मृत्यूची नोंद केली आहे.
‘फ्री प्रेस जर्नल’ने दिलेल्या माहितीनुसार, ध्रुविल हा एमबीएच्या पहिल्या वर्षात शिकत होता. ध्रुविल विलेपार्ले येथे शिकत असून हॉस्टेलमध्ये राहत होता. शुक्रवारी तो मालाड येथे आपल्या घरी गेला. आई आणि बहिणीसोबत गप्पा मारल्या. मग कामानिमित्त बाहेर गेलेल्या वडिलांसोबत फोनवर बोलला. त्यानंतर वडिलांची स्कूटी दुरुस्तीसाठी घेऊन जाण्याच्या बहाण्याने घरातून गेला.
ध्रुविल घरातून गेला आणि थेट इमारतीवरुन खाली उडी घेतली. त्याच्या कुटुंबीयांनी त्याला तात्काळ कांदिवली पश्चिमेकडील तुंगा रुग्णालयात नेले. मात्र डॉक्टरांनी त्याला मृत घोषित केले. याप्रकरणी मालाड पोलिसात आकस्मात मृत्यूची नोंद करण्यात आली आहे. अभ्यासाच्या तणावातून तरुणाने हे टोकाचे पाऊल उचलल्याचे प्राथमिक तपासात समोर आले आहे.