मध्य प्रदेशातील पंढुर्ना जिल्ह्यात माणुसकीला काळीमा फासणारी घटना घडली आहे. येथे एका अल्पवयीन मुलाला उलटे लटकवून त्यांच्या डोक्याजवळ गरम कोळसा ठेवला. यानंतर त्याला मारहाण केली. या घटनेचा व्हिडीओ सोशल मीडियावर प्रचंड व्हायरल होत आहे. हा व्हिडीओ व्हायरल झाल्यामुळे पीडित मुलाला त्रास देणाऱ्या तिघांना अटक करण्यात आली आहे.
पंढुर्ना जिल्हा मुख्यालयापासून 30 किलोमीटर अंतरावर असलेल्या मोहगावमध्ये रविवारी ही घटना घडली. एका मुलाचे दोरीने त्याचे हात पाय बांधून त्याला उलटे लटकवले. यानंतर त्याच्या डोक्याजवळ एका भांड्यात भरलेला गरम कोळसा ठेवण्यात आला. कोळश्याच्या धुरामुळे मुलाला श्वास घेण्यास त्रास होत होता. मात्र तरीही या नराधांनी दया न करता त्याला मारहाण देखील केली. पीडित मुलाची घड्याळ आणि इतर वस्तू चोरल्याच्या आरोपावरून अशी अवस्था करण्यात आल्याची प्राथमिक माहिती मिळाली आहे.
या प्रकरणी पंढुर्नाच्या पोलिसांनी या घटनेत सहभागी असलेल्या तीन जणांना अटक केली आहे. या तिघांविरुद्ध कलम 137(2) (अपहरण), 127(2) (चुकीच्या पद्धतीने बंदिवासात ठेवणे), 115 (दुखापत करणे), 296 (अश्लील कृत्ये) आणि भारतीय न्याय संहिता (BNS)च्या इतर संबंधित तरतुदींनुसार गुन्हा दाखल करण्यात आला. अशी माहिती पोलिस अधीक्षक (एसपी) सुंदर सिंह कनेश यांनी दिली आहे.
