राष्ट्रवादी काँग्रेसने सातारा आणि रावेर लोकसभा मतदारसंघासाठी आपले उमेदवार आज जाहीर केले. साताऱयात राष्ट्रवादीने आमदार शशिकांत शिंदे यांना रिंगणात उतरवले आहे तर रावेरमध्ये श्रीराम पाटील यांना उमेदवारी दिली आहे.
महाविकास आघाडीच्या जागावाटपात शरद पवार यांच्या राष्ट्रवादी काँग्रेसच्या वाटय़ाला 10 जागा आल्या आहेत. त्यापैकी 9 उमेदवार राष्ट्रवादीने जाहीर केले आहेत. आता केवळ माढा लोकसभा मतदारसंघातील उमेदवार जाहीर करणे बाकी आहे. सातारा मतदारसंघातील राष्ट्रवादीचे विद्यमान खासदार श्रीनिवास पाटील यांनी प्रकृतीच्या कारणास्तव निवडणूक लढवण्यास नकार दिल्यानंतर राष्ट्रवादीकडून तिथे कुणाला उतरवले जाणार याबद्दल उत्सुकता होती. शशिकांत शिंदे यांच्यासह तिघांच्या नावांचा विचार सुरू होता. अखेर शशिकांत शिंदे यांच्या नावावर शिक्कामोर्तब झाले.
रावेर लोकसभा मतदारसंघातून राष्ट्रवादीने श्रीराम पाटील यांना उमेदवारी दिली आहे. त्यांचा सामना भाजपच्या रक्षा खडसे यांच्याशी होणार आहे. रक्षा खडसे या राष्ट्रवादीतून भाजपात प्रवेशकर्ते झालेले एकनाथ खडसे यांच्या स्नुषा आहेत.
