चाकूर तालुक्यातील भाटसांगवी येथील बालाजी कोंडीबा वाघमारे आणि त्यांच्या पत्नी गयाबाई बालाजी वाघमारे हे दसर्‍याचे धुणे धुण्यासाठी गावच्या तलावात गेले होते. तलावात धुणे धुत असताना अचानक बालाजी यांचा पाय घसरला व ते त्यांच्या पत्नीसह तलावात पडले. तलावात पाणी खोल असल्याने बालाजी यांचा बुडून मृत्यू झाला. तर गयाबाई यांना आजुबाजूच्या लोकांनी वाचवले. मंगळवारी दुपारी 2 च्या सुमारास ही घटना घडली. बालाजी वाघमारे यांच्या प्रेताची तलावात शोध मोहीम युध्द पातळीवर सुरू असताना सायंकाळी मृतदेह शोधण्यात यंत्रणेला यश आले आहे.
चाकूर तालुक्यातील भाटसांगवी येथील रहिवाशी बालाजी कोंडीबा वाघमारे (वय 53 वर्षे) आणि त्यांच्या पत्नी गयाबाई बालाजी वाघमारे (वय 45 वर्षे) हे गावातील पाझर तलावावर दसर्‍याचे धुणे धुण्यासाठी गेले होते. पाण्याचा अंदाज न आल्याने पती बालाजी कोंडीबा वाघमारे यांचा खोल पाण्यात पाय घसरला आणि ते आणि त्यांची पत्नी गयाबाई दोघे पाण्यात बुडू लागले. सुदैवाने आजुबाजुच्या लोकांनी गयाबाई यांना पाण्यातून काढल्याने त्यांचे प्राण वाचले.
घटनेची माहिती मिळताच चाकूर येथून रुग्णवाहिका आणि अहमदपूर नगर परिषदेची अग्निशमन वाहन घटनास्थळी पोहचले असून, बालाजी वाघमारे यांचा मृतदेह काढण्यास युध्दपातळीवर काम सुरू होते. उशीरा सायंकाळी बालाजी वाघमारे यांचा मृतदेह सापडला. त्यांच्या मृत्यूने भाटसांगवी व चाकूर तालुक्यातून हळहळ व्यक्त होत आहे. त्यांच्या पश्चात पत्नी, दोन मुले आणि एक मुलगी असा परिवार आहे. बालाजी वाघमारे हे शेतमजूर म्हणून रोजंदारीवर काम करीत होते. त्यांची आर्थिक परिस्थिती नाजूक असून, कर्ता पुरुष डोळ्यासमोर पाण्यात बुडाल्याने पत्नीने यावेळी टाहो फोडला होता.
