सत्ताधारी पक्षाचे आमदार असूनही किसन कथोरे यांना मुरबाडचा विकास करता न आल्याने त्यांच्यावर नेहमीच टीकेची झोड उठते. मात्र आता ऐन विधानसभा निवडणुकीची रणधुमाळी सुरू असताना त्यांची अजब कथा समोर आली आहे. आमदार साहेब प्रचारासाठी घरासमोर अचानक आल्याने आपली संस्कृती जपत महाविकास आघाडीतील ज्येष्ठ कार्यकर्त्याने त्यांचा पाहुणचार केला. त्यांना घरात बोलवले. मात्र हीच संधी साधत कथोरेंनी चक्क पाहुणचाराला बोलावलेल्या या पदाधिकाऱ्याच्या गळय़ात भाजपचा गमछा घालून फोटो व्हायरल केले. याबाबत महाविकास आघाडीच्या मुरबाडमधील कार्यकर्त्यांनी संताप व्यक्त करत कथोरेंचा हा विश्वासघाती स्वभाव जुनाच असल्याची टीका केली आहे. मुरबाड विधानसभा मतदारसंघातून महाविकास आघाडीचे उमेदवार राष्ट्रवादी शरदचंद्र पवार पक्षाचे सुभाष पवार रिंगणात उतरले आहेत.
