जम्मू काश्मीरच्या कुपवाडा येथे बुलढाण्यातील जवान दीपक बनसोडे यांना वीरमरण आले आहे. बुलढाणा तालुक्यातील पळसखेड नागो येथील ते रहिवासी आहेत.
जिल्हा सैनिक कल्याण कार्यलयाने दिलेल्या माहितीनुसार, 22 सप्टेंबरच्या रात्री उशीरा वाहनाचा अपघात होऊन दीपक बनसोडे यांचा मृत्यू झाला. दीपक यांची पत्नी देखील पोलीस दलात कार्यरत आहेत. 24 सप्टेंबरला दीपक हे सुट्टीवर गावी येणार होते. मात्र त्याआधीच त्यांना वीरमरण आल्याने, कुटुंबीयांवर दु:खाचा डोंगर कोसळला असून गावावर शोककळा पसरली आहे. दीपक यांचे पार्थिव उद्या 25 सप्टेंबरला त्यांच्या मुळगावी पळसखेड नागो येथे आणण्यात येणार आहे. तिथे त्यांच्यावर शासकीय इतमामात अंत्यसंस्कार होतील, अशी माहिती जिल्हा सैनिक कल्याण कार्यालयाने दिली आहे.