महिलांच्या सुरक्षेचा मुद्दा सध्या देशभरात गाजत आहे. देशाच्या कानाकोपऱ्यातून दररोज विनयभंगाच्या आणि बलात्काराच्या घटना समोर येत आहेत. त्यामुळे सत्ताधाऱ्यांनी केलेला महिला सुरक्षेचा दावा फोल ठरला आहे. अशातच आता नगर जिल्ह्यातील अजित पवार गटाचे माजी आमदार भानुदास मुरकुटे यांना महिलेवरील अत्याचाराच्या आरोपांवरून अटक करण्यात आली आहे.
राहुरी पोलिसांनी सोमवारी (7 ऑक्टोबर 2024) मध्यरात्री पीडित महिलेच्या फिर्यादीवरून भानुदास मुरकुटे यांना त्यांच्या राहत्या घरातून ताब्यात घेतले आहे. पोलिसांनी दिलेल्या माहितीनुसार, राहुरी तालुक्यातील एका महिलेने सोमवारी भानुदास मुरकुटे यांच्याविरोधात फिर्याद दाखल केली होती. मुरकुटे यांनी 2019 पासून मुंबई, दिल्ली त्याचबरोबर नगर जिल्ह्यातील वेगवेगळ्या ठिकाणी महिलेवर अत्याचार केल्याचा आरोप पीडित महिलेने केला आहे. पीडित महिलेने दिलेल्या फिर्यादीनंतर पोलिसांनी भानुदास मुरकुटे यांना ताब्यात घेतले आहे. पोलिसांनी मुरकुटे यांच्यावर आयपीसी कलम 376, 328, 418, 506 अन्वये गुन्हा दाखल केला आहे.
