यवतमाळमधील वणी येथे भगवान सॉ मिल या दुकानाला मध्यरात्री भीषण आग लागल्याची घटना घडली आहे. आगीचे वृत्त कळताच अग्नीशमन दलाने घटनास्थळी धाव घेत बचावकार्य सुरू केले. तीन ते चार तासांच्या अथक प्रयत्नांनंतर आग आटोक्यात आणण्यास यश आले आहे. सुदैवाने यात कोणतीही जीवितहानी झाली नाही. मात्र लाखोंचे साहित्य जळून खाक झाले.
वणी येथील दीपक चौपाटी परिसरात भगवान सॉ मिल दुकानाला आग लागली. आगीचे नेमके कारण समजू शकले नाही. मात्र शॉर्ट सर्किटमुळे ही आग लागल्याचा प्राथमिक अंदाज वर्तवण्यात येत आहे. ही आग इतकी भीषण होती की दूरवर या आगीचे लोंढे पसरले होते. आग आटोक्यात आणल्यानंतरही सकाळी उशिरापर्यंत ही आग धुमसत होती.
या दुकानात लाकडी वस्तू बनवण्याचे काम चालते. दुकानाच्या मागच्या बाजूला लाकडाचा भुसा ठेवला जातो. काल मध्यरात्रीच्या सुमारास परिसरातील लोकांना दुकानाच्या मागच्या बाजूने धूर येताना दिसला. त्यांनी याबाबत सुरक्षारक्षकाला सांगितले. यानंतर दुकानमालकाला आगीची माहिती देण्यात आली.
पाहता पाहता आगीने रौद्ररुप धारण केले. या आगीत दुकानातील सर्व सामान जळून खाक झाले. अग्नीशमन दलाने तात्काळ घटनास्थळी धाव घेत चार तासांच्या प्रयत्नांनंतर आगीवर नियंत्रण मिळवले.
