![nagar infant found](https://www.saamana.com/wp-content/uploads/2024/07/nagar-infant-found-696x447.jpg)
साईबाबा संस्थानच्या साईनाथ रुग्णालयात माणुसकीला काळिमा फासणारी घटना उघडकीस आली आहे. प्रसुती वॉर्ड शेजारील कचराकुंडीत मंगळवारी रात्री स्त्री जातीचे बेवारस अर्भक आढळून आले आहे. या घटनेमुळे परिसरात एकच खळबळ उडाली आहे.
सफाई कर्मचारी सफाईचे करत असताना हा सगळा धक्कादायक प्रकार उघडकीस आला. कॅरीबॅगमध्ये जड वस्तू दिसल्याने ते उघडून पाहिले असता त्यात स्त्री जातीचं अवघ्या काही तासांपूर्वी जन्मलेलं अर्भक मृत अवस्थेत आढळून आलं. या घटनेनंतर रुग्णालयासह परिसरात एकच खळबळ उडाली.
प्रकरणाची चौकशी केली असता सदर अर्भक हे साईबाबा संस्थानच्या रुग्णालयात जन्मलेलं नसल्याची बाब मुख्य कार्यकारी अधिकारी यांनी निदर्शनास आणून दिली. याबाबत साईबाबा संस्थानच्या वतीने पोलिसात तक्रार दाखल करण्यात आली आहे. तसेच रुग्णालयातील सीसीटीव्ही फुटेजही पोलीस तपासत आहेत.
नेमकं हे अर्भक कुणी आणून टाकलं? या बेवारस मृत अर्भकाचे माता-पिता कोण? याचा तपास करण्याचं आव्हान पोलिसांसह रुग्णालय प्रशासनासमोर आहे.