गेल्या महिन्याच्या अखेरीस उद्भवलेली महापुराची परिस्थिती ओसरून जनजीवन पुन्हा सुरळीत सुरू असताना, शुक्रवारपासून जिह्यात सर्वत्र पावसाने धडाका लावला. सलग तीन दिवस जिह्यात तुफान पाऊस सुरू आहे. रात्रंदिवस संततधार कोसळणाऱया पावसाने पंचगंगेच्या पातळीत तब्बल दहा फुटांहून अधिक वाढ झाली. जिकडे तिकडे पाणीच पाणी होऊन रस्त्यावरील खड्डय़ांचे मोठमोठे डबके तसेच सखल भागात साचलेल्या पाण्यातून जाताना सर्वांना मोठी कसरत करावी लागत होती. त्यामुळे जनजीवनावर काहीसा परिणाम जाणवू लागला.
आज सकाळी राधानगरी धरणाचा 6 क्रमांकाचा स्वयंचलित दरवाजा उघडला. त्यातून 2 हजार 928 क्युसेक विसर्ग सुरू होता. पाठोपाठ धरणाचे 3, 4, 5 क्रमांकांचे स्वयंचलित दरवाजे उघडले. त्यातून 5 हजार 712 आणि विद्युत गृहातून 1 हजार 500 असा एकूण 7 हजार 212 क्युसेक विसर्ग सुरू होता. आतापर्यंत जिह्यातील 16 बंधारे पाण्याखाली गेले असून, कर्नाटकातील अलमट्टीतून 42 हजार क्युसेक व हिप्परगीतून 22 हजार 251 क्युसेक पाण्याचा विसर्ग सुरू आहे.
पंचगंगा नदीवरील शिंगणापूर, राजाराम, सुर्वे, रुई, इचलकरंजी, तेरवाड, शिरोळ व रुकडी, वेदगंगा नदीवरील कुरणी, बस्तवडे व कासारी नदीवरील यवलूज असे बंधारे पाण्याखाली आहेत.
आज सकाळी 7च्या अहवालानुसार, आपल्या जिह्यातील धरणांमध्ये पुढीलप्रमाणे- (टीएमसी) पाणीसाठा आहे. राधानगरी 8.33 (टीएमसी), तुळशी 3.46, वारणा 31.25, दूधगंगा 22.73, कासारी 2.63, कडवी 2.44, कुंभी 2.57, पाटगाव 3.48, चिकोत्रा 1.34, चित्री 1.88, जंगमहट्टी 1.22, घटप्रभा 1.30, जांबरे 0.76, आंबेआहोळ 1.24 व कोदे लघु प्रकल्प 0.21 टीएमसी इतका पाणीसाठा आहे.
पंचगंगा नदीवरील राजाराम बंधारा 20.1 फूट, सुर्वे 19.9 फूट, रुई 46.3 फूट, इचलकरंजी 44 फूट, तेरवाड 39.9 फूट, शिरोळ 32.6 फूट, नृसिंहवाडी 30 फूट, राजापूर 21.7 फूट, तर नजीकच्या सांगली 11.9 फूट व अंकली 12.9 फूट अशी आहे. सायंकाळी चारच्या सुमारास पंचगंगेच्या पातळीत पावणेदोन फुटाने वाढ होऊन, पातळी 21 फूट 8 इंच झाली होती.
कोल्हापूर जिह्यात 24 तासांत 30.6 मि.मी. पाऊस
z कोल्हापूर जिह्यात काल दिवसभरात गगनबावडा तालुक्यात सर्वाधिक 58.4 मि.मी. पाऊस पडल्याची नोंद झाली आहे, तर हातकणंगले 21.4, शिरोळ 13.1, पन्हाळा 29.3, शाहूवाडी 33.9, राधानगरी 42.6, करवीर 27, कागल 28.6, गडहिंग्लज 21.4, भुदरगड 37.3, आजरा 53.3 आणि चंदगड तालुक्यात 39.7 मि.मी. पाऊस पडल्याची नोंद आहे.
