![nagpur man killed](https://www.saamana.com/wp-content/uploads/2024/07/nagpur-man-killed-696x447.jpg)
पती-पत्नीतील वाद मिटवण्याचा प्रयत्न भाडेकरूच्या जीवावर बेतला आहे. भाडेकरू सतत मध्यस्थी करण्याचा प्रयत्न करीत असल्याच्या रागातून घरमालकाने भाडेकरूची हत्या केली. घरमालकाने भाडेकरूवर चाकूने हल्ला केला. नागपूरमध्ये ही धक्कादायक घटना घडली आहे. चाकूहल्ल्यात गंभीर दुखापत झाल्याने भाडेकरूचा काही वेळातच मृत्यू झाला. पोलिसांनी आरोपी घरमालकाला अटक केली आहे. महेश उके असे आरोपीचे तर पंकज सोलंकी असे मयताचे नाव आहे.
पंकज हा खाजगी कंपनीत कामाला होता. शुक्रवारी रात्री पंकज नेहमीप्रमाणे कामावरून घरी आला. त्यावेळी घरमालक महेश उके व त्याच्या पत्नीचे कडाक्याचे भांडण सुरू होते. भांडण मिटवण्यासाठी पंकज मध्ये पडला आणि दोघांना शांत करण्याचा प्रयत्न करू लागला.
मात्र पत्नीसोबतच्या वादात पंकजचा काहीही संबंध नसताना तो मध्यस्थी करीत असल्याचा राग महेशला अनावर झाला. त्याच रागाच्या भरात महेशने पंकजच्या पोटात चाकू खुपसला. या हल्ल्यात पंकज रक्तबंबाळ होऊन खाली कोसळला.
पंकजला गंभीर जखमी अवस्थेत रुग्णालयात नेत असताना वाटेतच त्याचा मृत्यू झाला, असे एका वरिष्ठ पोलीस अधिकाऱ्याने सांगितले. याप्रकरणी पोलिसांनी हत्येचा गुन्हा दाखल करून आरोपी महेश उकेला अटक केली आहे.