निवडणुकीमध्ये मतदानाचा हक्क बजावण्यासाठी बृहन्मुंबई क्षेत्रातील सर्व व्यवसाय, व्यापार, उद्योग समूह, महामंडळे, कंपन्या व संस्था, औद्योगिक उपक्रम आणि इतर आस्थापनांमध्ये कार्यरत असलेले कामगार, कर्मचारी तसेच अधिकाऱयांना 20 नोव्हेंबर रोजी सुट्टी देणे संबंधित संस्थांसाठी बंधनकारक राहील. या नियमांचे पालन न करणाऱया संस्थांविरोधात कारवाई केली जाईल, असे निर्देश जिल्हा निवडणूक अधिकारी तथा बृहन्मुंबई महानगरपालिका आयुक्त भूषण गगराणी यांनी दिले. मतदानाच्या या सुट्टीच्या बदल्यात संबंधित व्यक्तीच्या वेतनात कोणत्याही प्रकारची कपात करता येणार नाही. अपवादात्मक परिस्थितीत मतदानाचा हक्क बजावण्यासाठी पूर्ण दिवसाची सुट्टी देणे शक्य नसल्यास त्यांना किमान चार तासांची सवलत देता येईल, परंतु यासाठी जिल्हा निवडणूक अधिकारी यांची पूर्वपरवानगी घेणे आवश्यक राहील. सुट्टी किंवा सवलत प्राप्त न झाल्याने एखाद्या व्यक्तीला मतदानाचा हक्क बजावण्यापासून वंचित राहावे लागल्यास संबंधितांविरोधात कारवाई करण्यात येईल, असे निर्देशही गगराणी यांनी दिले आहेत.
