माहीम विधानसभा मतदारासंघातील शिवसेनेचे उमेदवार महेश सावंत यांच्या निवडणूक कार्यालयाचे शनिवारी संध्याकाळी खासदार अनिल देसाई यांच्या प्रमुख उपस्थितीत उद्घाटन होणार आहे. माहीम लेडी जमशेटजी मार्गावरील येथील शोभा हॉटेलजवळील काद्री वाडीत महेश सावंत यांचे मुख्य निवडणूक कार्यालय सुरू होत आहे. संध्याकाळी सात वाजता या कार्यालयाचे उद्घाटन होईल.
बीडमध्ये काका आणि दोन पुतणे निवडणुकीच्या रिंगणात
बीड विधानसभा मतदारसंघात काका विरुद्ध दोन पुतणे असा संघर्ष पाहायला मिळणार आहे. जयदत्त क्षीरसागर यांनी अपक्ष उमेदवारी अर्ज दाखल केला आहे. तर पुतण्या संदीप हे शरद पवार यांच्या राष्ट्रवादीतून आणि दुसरा पुतण्या योगेश अजित पवार गटाकडून निवडणूक लढवत आहेत. 2019च्या निवडणुकीत जयदत्त क्षीरसागर विरुद्ध पुतण्या संदीप असा थेट सामना झाला होता. आता दुसरा पुतण्याही निवडणूक रिंगणात उतरला आहे.
उपमुख्यमंत्री देवेंद्र फडणवीस यांच्या सुरक्षेत वाढ
उपमुख्यमंत्री देवेंद्र फडणवीस यांच्या नागपुरातील घराबाहेर सुरक्षेत वाढ करण्यात आली आहे. गुप्तचर अहवालात फडणवीस यांना धोका होण्याची भीती व्यक्त करण्यात आली होती. त्यामुळे विधानसभा निवडणुकीच्या पार्श्वभूमीवर फोर्स वनचे अतिरिक्त 10 ते 12 कमांडो तैनात करण्याचा निर्णय घेतला आहे.
