राज्यात सध्या सर्वत्र विधानसभा निवडणुकीची रणधुमाळी सुरू आहे. आचारसंहितेमुळे निवडणूक निरिक्षकांसह पोलिसांची भरारी पथके ठिकठिकाणी तैनात असून,वाहनांसह पार्ट्यांवर करडी नजर आहे. अशातच बुधवारी रात्री उशिरा गगनबावडा तालुक्यातील कोदे बुद्रुक पैकी आंबेवाडी येथील नयनील फार्म रिसॉर्टमध्ये बेकायदेशीर सुरू असलेल्या पार्टीवर कोल्हापूर पोलिसांनी छापा टाकला. यावेळी 9 नृत्यांगनांसह 31 जणांना ताब्यात घेतले. तर मद्य, मोबाईल फोन व इतर साहित्य असा तब्बल 4 लाख 51 हजार 100 रुपयांचा मुद्देमाल जप्त करण्यात आला.ऐन दिवाळीत तसेच आचारसंहिता सुरू असताना बेकायदेशीरपणे सुरू असलेला छमछम प्रकार समोर आल्याने, खळबळ उडाली आहे.
पोलिसांकडून मिळालेल्या माहितीनुसार, गगनबावडा तालुक्यातील कोदे बुद्रुक पैकी आंबेवाडी येथील बुधवारी (दि.30) रात्री नयनील फार्म रिसॉर्टमध्ये नृत्यांगनासोबत काही तरुण बेकायदेशीर पार्टी करत असल्याची माहिती मिळाली. उपविभागीय पोलिस अधिकारी शाहूवाडी विभाग व गगनबावडा पोलिसांच्या संयुक्त पथकाने या पार्टीवर रात्री नऊच्या सुमारास छापा टाकला. यावेळी मद्यधुंद अवस्थेत तोकड्या कपड्यात, अश्लील व बीभत्स हावभाव करणाऱ्या नृत्यांगणांसह विगरपरवाना दारूचे सेवन करणारे तसेच मद्याच्या बाटल्या निदर्शनास आले. याप्रकरणी 9 नृत्यांगनांसह एकूण 31 जणांवर गगनबावडा पोलीस ठाण्यात गुन्हा दाखल करण्यात आला. यामध्ये मुंबई, पुणे येथील काही जणांचा समावेश आहे. यावेळी पार्टीत आढळलेला मद्य, मोबाईल फोन व इतर साहित्य असा तब्बल 4 लाख 51 हजार 100 रुपयांचा मुद्देमाल पोलिसांनी जप्त केला.
जिल्हा पोलिस अधीक्षक महेंद्र पंडित, अप्पर पोलिस अधीक्षक जयश्री जाधव,उपविभागिय पोलिस अधिकारी आप्पासो पवार यांच्या मार्गदर्शनाखाली गगनबावडा पोलिस ठाण्याचे स.पो.नि.ज्ञानदेव वाघ, श्रीकांत मामलेकर,मानसिग सातपुते,संदीप पाटील, सागर पाटील,दिगंबर पाटील,अशोक पाटील,अमोल तेली या पोलिस पथकाने ही कारवाई केली.
