राष्ट्रवादी काँग्रेस अजित पवार गटातील नेते नवाब मलिक यांचे दाऊदशी संबंध असल्याचा आरोप भाजपाच्या काही नेत्यांनी केला होता. त्याला नवाब मलिक यांनी आज प्रत्युत्तर दिले. दाऊदशी संबंध जोडणाऱ्यांना कायदेशीर नोटीस बजावणार असल्याचा इशारा मलिक यांनी दिला. नवाब मलिक म्हणाले, माझ्या प्रचाराला या, असा आग्रह मी करत नाही. मी राष्ट्रवादी काँग्रेस पक्षाचा उमेदवार आहे. जनतेच्या पाठबळाच्या आधारावर मी निवडणूक लढवत आहे. मात्र माझं नाव जे दाऊदशी जोडत आहेत त्यांच्यावर मी कायदेशीर कारवाई करणार आहे. मी माझी विचारसरणी बदलणार नाही. माझी माझ्या विचारांशी बांधिलकी आहे. नवाब मलिक यांना पक्षाने दिलेल्या उमेदवारीवरून सध्या महायुतीमध्ये वाद सुरू आहे. मागील निवडणुकीत ते अणुशक्तीनगर येथून विजयी झाले होते. यावेळी मानखुर्द शिवाजीनगर मतदारसंघातून निवडणुकीच्या रिंगणात उतरले आहेत.
