चेंबूर येथील वसतिगृहात राहणाऱ्या एका विद्यार्थिनीने गळफास घेऊन आत्महत्या केल्याची घटना बुधवारी रात्री समोर आली. याबाबत वसतिगृह अधिकाऱ्यांनी माहिती दिल्यानंतर चेंबूर पोलिसांनी अपमृत्यूची नोंद करत चौकशी सुरू केली आहे.
चेंबूर नाका येथील बेगर्स होम परिसरात सामाजिक न्याय व विशेष सहाय्यक विभागाचे शासकीय वसतिगृह आहे. तेथे अनेक विद्यार्थिनी वास्तव्यास आहेत. दीक्षा कांबळे (23) ही विद्यार्थिनीदेखील तेथे राहत होती. मूळची देवगडची असलेली ही विद्यार्थिनी वरळी येथील सस्मीरा इन्स्टिटय़ूट कॉमर्स ऍण्ड सायन्स महाविद्यालयात बीएसी आयटीच्या द्वितीय वर्षात शिकत होती. बुधवारी रात्री महाविद्यालयातून वसतिगृहात परतल्यानंतर तिने रात्रीचे जेवण केले. त्यानंतर ती काही वेळ कोणाशी तरी मोबाईल बोलत होती. त्यानंतर तिने एका खोलीत जाऊन गळफास लावून आत्महत्या केली. मात्र बराच वेळ होऊनदेखील ती झोपण्यासाठी खोलीत न आल्याने तिच्या मैत्रिणींनी तिला अनेकदा आवाज दिला तसेच दरवाजादेखील उघडण्याचा प्रयत्न केला. मात्र ती दरवाजा उघडत नसल्याने त्यांनी याची माहिती चेंबूर पोलिसांना दिली. त्यानुसार चेंबूर पोलिसांनी घटनास्थळी जाऊन दरवाजा उघडला असता तिने पंख्याला गळफास घेतलेला आढळून आले.
