काहीही काम न करता कोटींमध्ये पैसे कमावण्याचे स्वप्न अनेक जण पाहतात. तुम्हाला जर काहीही काम न करता कोटी रुपये कमावण्याचे काम मिळाले, तर तुम्ही हसत हसत हे काम कराल. परंतु, हिंदुस्थानात असे काम मिळणे अशक्यप्राय गोष्ट आहे. पण जर तुम्ही जपानला जाण्यास इच्छूक असाल, तर तुम्हाला ‘काहीही काम न करण्याचे’ काम मिळण्याची शक्यता आहे. कारण जपानमधील एक तरूण काहीही काम न करता वर्षाला तब्बल 6 कोटी रुपये कमावत आहे.
शोझी मोरिमोटो असे या जपानी तरुणाचे नाव असून तो ‘Do Nothing Guy’ या नावाने जपानमध्ये प्रसिद्ध आहे. त्याने स्वत:चा एक असा व्यवसाय निर्माण केला आहे. त्याच्या या व्यवसायात त्याला लोकांसोबत फक्त वेळ घालवण्याचे पैसे मिळतात. विशेष म्हणजे लोकसुद्धा त्याला मोठी रक्कम फी स्वरुपात देतात. त्याच्या कामाचे स्वरुप साधे आणि सरळ आहे. तो नागरिकांना मानसिक आधार देतो, तसेच त्यांचा एकटेपना दुर करण्यासाठी त्यांना सहकार्य करतो. मोरिमोटोच्या म्हणण्यानुसार, त्याचा फक्त सहवास नागरिकांना हवा असतो. त्यासाठी लोकं त्याच्यासोबत करार करतात. तसेच बरेच लोकं व्हेटिंगमध्ये सुद्धा असतात. लोकांसोबत जेवायला जाणे, फिरायला जाणे, त्यांचं बोलण ऐकने अशा पद्धतीच काम तो करतो. तो कोणताही सल्ला लोकांना देत नाही किंवा कोणत्याही अॅक्टिविटीमध्ये सहभागी होत नाही. अशा पद्धतीने तो काहीही काम न करता कोटी रुपये कमावत आहे.
जपान हा देश कितीही प्रगतशील असला तरी, जपानमध्ये एकटेपणाची खूप मोठी समस्या आहे. जवळपास 40 हजार नागरिकांचा मृत्यू एकटेपणामुळे झाल्याचे, एका अहवालात सांगण्यात आले आहे. त्याचबरोबर जपानमध्ये वयस्कर नागरिकांची संख्या सर्वाधिक आहे.
