नवी मुंबई महापालिकेच्या अखत्यारीतील खेळाच्या मैदानाचा मोठा भूखंड वैद्यकीय महाविद्यालय व रुग्णालय बांधकामासाठी देण्याच्या सिडकोच्या निर्णयाला उच्च न्यायालयात आव्हान देण्यात आले आहे. 40 प्लस मास्टर क्रिकेटर्स असोसिएशनने अॅड. अक्षय मालविया व अॅड. हर्षवर्धन सूर्यवंशी यांच्यामार्फत याचिका दाखल केली आहे. या याचिकेवर बुधवारी तातडीने सुनावणी होणार आहे.
सीबीडी-बेलापूर येथील दोन रेल्वे ट्रक व जेएनपीटी हायवेदरम्यान असलेल्या सेक्टर 15-ए परिसरात खेळाचे मैदान आहे. हे मैदान सध्या याचिकाकर्त्या असोसिएशनद्वारे वापरले जात आहे. असोसिएशनने निःस्वार्थी भावनेने मैदान विकसित केले आहे. यापूर्वी सिडको व नवी मुंबई महापालिकेमार्फत या जागेचा डम्पिंग ग्राउंड म्हणून वापर केला जायचा. आता याठिकाणी स्थानिक नागरिक व असोसिएशनने काही झाडे लावली आहेत. सीबीडी-बेलापूरचे स्थानिक नागरिकही मैदानाचा वापर करीत आहेत. हे मैदान ‘कोस्टल रेग्युलेशन झोन’मध्ये मोडते. नागरिकांसाठी उपयोगी असलेले मैदान रुग्णालय बांधकामासाठी देण्याचा सिडकोचा निर्णय नागरिकांच्या मूलभूत हक्कांवर गदा आणणारा आहे, असा दावा याचिकेत केला आहे. ज्येष्ठ वकील अनिल अंतुरकर यांनी सोमवारी मुख्य न्यायमूर्ती देवेंद्र कुमार उपाध्याय व न्यायमूर्ती अमित बोरकर यांच्या खंडपीठाचे याचिकेकडे लक्ष वेधले. त्यांच्या युक्तिवादाची गंभीर दखल घेत खंडपीठाने बुधवारी सुनावणी ठेवली. नियोजित रुग्णालय बांधकामाचा निविदा प्रस्ताव रद्द करण्याची विनंती याचिकेतून केली आहे.
