नगर जिल्ह्यातील श्रीगोंदा तालुक्यामध्ये शुक्रवारी रात्री झालेल्या दोन वेगवेगळ्या अपघातामध्ये तीन जण ठार झाले, तर दोघे जखमी झाले. विकास दादा वाकळे, गणेश छबू वाकळे आणि लक्ष्मण नारायण भेसर अशी मृतांची, तर अक्षय गायकवाड आणि दादा रामा भेस अशी जखमींची नावे आहेत.
मिळालेल्या माहितीनुसार, रात्री साडे दहा वाजता विकास, गणेश आणि लक्ष्मण हे बुलेटवरून (क्र. एमएच 03 बीयू 6516) पेट्रोल पंपाकडे जात होते. याचवेळी त्यांची गाडी घसरली आणि नदीत पडली. यात ते जखमी झाले. जखमींना रुग्णालयात नेण्यासाठी एक रुग्णवाहिका बोलावण्यात आली. विकास आणि गणेशला श्रीगोंदा येथील मेडिकेअर रुग्णालयात दाखल केले, तर लक्ष्मण आणि त्यांचा पुतण्या रामा यांना रुग्णालयात नेताना रुग्णवाहिका (क्र. एमएच 09 बीसी 1784) आणि फोड फिगो कार (क्र. एमएच 39 जे 9252) यांच्यात समोरासमोर धडक झाली.
यात लक्ष्मण भेसर जागीच ठार झाला, तर रुग्णवाहिका चालक अक्षय गायकवाड आणि दादा भेसर जखमी झाले. अपघातानंतर फोर्डचा चालक, राजापूर-माठ गावाचे कामगार तलाठी विजय मोरे घटनास्थळावरून पसार झाले. तर दुसरीकडे मेडिकेअर रुग्णालयात नेलेल्या विकास आणि गणेश या वाकळे (रा. पारगाव) बंधुंचाही उपचारांपूर्वीच मृत्यू झाला. त्यामुळे गावावर शोककळा पसरली आहे.
