विराट कोहली केवळ फलंदाज नाही. तो आमचा मार्गदर्शक आहे. आमचे प्रेरणास्थान आहे. संघासोबत असताना त्याचा जोश आणि उत्साह अभूतपूर्व असतो. संघाला एका धाग्यात बांधून ठेवण्याची क्षमताही अफलातून असल्याची स्तुतिसुमने हिंदुस्थानचा मधल्या फळीतील युवा फलंदाज सरफराज खानने उधळली आहेत.
या वर्षी इंग्लंडविरुद्ध मालिकेत कसोटी पदार्पण करणारा सरफराज हा रॉयल चॅलेंजर्स बंगळुरूचाही खेळाडू होता आणि कोहलीबरोबर आयपीएल खेळण्याचाही त्याला चांगलाच अनुभव आहे. आता तो प्रथमच कसोटीत कोहलीबरोबर खेळणार आहे. गेल्या मालिकेत कोहली वैयक्तिक कारणामुळे खेळू शकला नव्हता. मात्र यावेळी कोहलीने पुनरागमन केले असून सरफराज त्याच्यासोबत खेळण्यासाठी उत्सुक आहे.
कोहली खेळाने प्रभावित असलेला सरफराज म्हणाला, मी जेव्हाही विराट यांना पाहायचो, ते सामन्याच्या आधी होणारी बैठक असो किंवा मैदानात घडणारी कोणतीही घटना, ते नेहमीच जबाबदारी घेतात. मैदानात त्यांनी कुणा गोलंदाजाविरुद्ध किती धावा केल्या याची इत्थंभूत माहिती ते देतात. प्रत्येकासमोर त्यांचा सकारात्मक दृष्टिकोन पाहून मी थक्क झालोय. ते आम्हाला मार्गदर्शन केल्यानंतर दुसऱया दिवशी ज्या पद्धतीने भन्नाट खेळतात, यावरून त्यांची अद्भुत क्षमता आम्हा सर्वांना कळल्याचेही तो म्हणाला. त्यांच्यासोबत हिंदुस्थानी संघात खेळणे हे माझे स्वप्न आहे आणि भविष्यात संधी मिळाली तर ते प्रत्यक्षात साकारही होईल, असेही सरफराज आवर्जून म्हणाला.
