निगडी येथील दुर्गा टेकडीवर नेऊन 15 वर्षीय मुलीवर एका तरुणाने लैंगिक अत्याचार केला. यासाठी पीडित मुलीच्या 15 वर्षीय मैत्रिणीने आरोपी तरुणाला मदत केली. घडलेल्या प्रकरणाची वाच्यता केल्यास ठार मारण्याची धमकी दिल्याने मुलीने कोणास काही सांगितले नाही. मात्र, पीडित मुलगी दोन महिन्यांची गरोदर राहिल्यानंतर हे प्रकरण उघडकीस आले. ही घटना 5 जुलै ते 9 ऑगस्ट या कालावधीत घडली.
पीडित 15 वर्षीय मुलीच्या आईने निगडी पोलीस ठाण्यात फिर्याद दिली आहे. सलीम (वय 22, रा. ओटा स्कीम,निगडी) आणि 15 वर्षीय मैत्रिणीविरोधात बाललैंगिक अत्याचारासह अनुसूचित जाती, अनुसूचित जमाती अत्याचार प्रतिबंधक कायद्यान्वये गुन्हा दाखल करण्यात आला आहे. पीडित मुलगी घरात एकटी असताना तिच्यावर अत्याचार करण्याच्या उद्देशाने ‘तू माझ्यासोबत दुर्गा टेकडी येथे चल; नाहीतर तुला व तुझ्या कुटुंबाला जीवे मारून कुटुंब संपवून टाकीन,’ अशी धमकी सलीम याने दिली. तिला बळजबरीने दुर्गा टेकडी येथे नेले. तेथे काही अंतरावर पीडित मुलीची 15 वर्षीय वर्गमैत्रीण थांबली. सलीमने मुलीवर तीन वेळा लैंगिक अत्याचार केला.
वर्गमैत्रिणीने पीडित मुलीला यासाठी भाग पाडले. सलीमने पीडित मुलीला घडलेल्या प्रकाराबाबत कोणास काही सांगितल्यास गळा दाबून ठार मारण्याची धमकी दिली. त्यामुळे मुलीने कुठेही वाच्यता केली नाही. मुलगी दोन महिन्यांची गरोदर राहिल्यानंतर हे प्रकरण उघडकीस आले. सहायक पोलीस निरीक्षक कदम तपास करीत आहेत.
