पॅरिस ऑलिम्पिकमध्ये हिंदुस्थानला पदके जिंकून देणारे मनू भाकर आणि सरबज्योत सिंग या दोन्ही नेमबाजांना हरियाणा सरकारने नोकरीची ऑफर दिली होती, मात्र दोघांनीही हे सरकारी काम करण्यास नकार दिला आहे. आम्ही नोकरीसाठी नव्हे, तर सुवर्णपदकांसाठी खेळत आहे. त्यामुळे सध्या तरी आम्हाला नोकरी नकोय.
हरियाणाच्या मुख्यमंत्र्यांचे मीडिया समन्वयक मुकेश वशिष्ठ यांनी या मुद्द्यावर प्रतिक्रिया दिली. ते म्हणाले, मनू भाकर आणि सबरज्योत सिंग यांना क्रीडा विभागात उपसंचालकपदाची ऑफर देण्यात आली होती, मात्र त्यांनी सरकारी नोकरी करणार नसल्याचे स्पष्ट केले. दोघांचे म्हणणे आहे की, आम्हाला सध्या खेळावरच लक्ष्य केंद्रित करायचे आहे. आम्ही नोकरीसाठी नव्हे, तर सुवर्णपदकांसाठी खेळत आहे.
दरम्यान, ऑलिम्पिकमध्ये दोन पदके जिंकणाऱ्या मनू भाकरला क्रीडा मंत्रालयाने 30 लाख रुपयांचे बक्षीस दिले आहे. क्रीडामंत्री मनसुख मांडविया यांची आज मनू भाकरने भेट घेतली. ‘त्यांनी दिलेल्या पाठिंब्याबद्दल व प्रोत्साहनाबद्दल खूप आभार. त्यांच्या अविरत प्रयत्नांनी देशाचे खेळाडू आणखी उंच शिखरावर पोहोचतील अशी मला खात्री आहे,’ असे मनू भाकरने सोशल मीडियावर ट्विट करत म्हटले आहे. यासोबतच सरबज्योत सिंगला हरियाणा सरकारने 2.50 कोटी रुपयांचे रोख बक्षीसही देऊ केले आहे. हरियाणाचे क्रीडामंत्री संजय सिंह यांनी हे बक्षीस जाहीर केले होते.
