अमरावती लोकसभा निवडणुकीत विद्यमान खासदार नवनीत राणा यांच्याविरोधात प्रहार जनशक्ती पक्षाचे अध्यक्ष बच्चू कडू यांनी प्रचारातून जोरदार हल्ले करायला सुरुवात केली आहे. ही निवडणूक धनशक्ती विरुद्ध जनशक्ती अशी आहे. सामान्य माणूस जेव्हा पेटून उठतो तेव्हा ती ज्वाला होते. त्यामुळे पुढील 20 दिवस झोपू नका, विरोधकांची झोप उडवा, असे भावनिक आवाहन बच्चू कडू यांनी केले.
अमरावती लोकसभा मतदारसंघात ‘प्रहार’चे उमेदवार दिनेश बूब यांनी नामांकन दाखल केले. यावेळी आयोजित प्रचारसभेत त्यांनी नवनीत राणा यांना उमेदवारी देणाऱया देवेंद्र फडणवीस यांच्यावरही निशाणा साधला. आमदार श्रीकांत भारतीय यांचे आई-वडील घरात एकटेच असताना त्यांच्या घरावर हल्ला करण्यात आला. आपल्या माणसांच्या घरावर हल्ला करणाऱयांना ‘भाजप’ने उमेदवारी देणे योग्य नाही. जिह्यात भाजपच्या पालकमंत्र्याला ‘बालकमंत्री’ म्हणणारे आणि त्यांना बांगडय़ा देण्याचा प्रयत्न करणाऱयांना भाजपने उमेदवारी दिली आहे, असे बच्चू कडू म्हणाले.
‘मातोश्री’समोर हनुमान चालिसा पठणाचा हट्ट दुर्दैवी!
संपूर्ण देशाला खऱया अर्थाने हिंदुत्व काय आहे, याची शिकवण शिवसेनाप्रमुख बाळासाहेब ठाकरे यांनी दिली. असे असताना राणा दाम्पत्याचा थेट ‘मातोश्री’समोर हनुमान चालिसा पठणाचा हट्ट हा दुर्दैवी होता, असे बच्चू कडू म्हणाले.
