ऐन लग्नसराईच्या मोसमात सोन्याच्या दराने नवा उच्चांक गाठला आहे. सोन्याचे दर प्रतितोळा 71 हजार 700 रुपयांवर पोहोचले असून ग्राहकांच्या खिशाला कात्री लागत आहे. विशेष म्हणजे अवघ्या 15 दिवसांत सोन्याच्या दरात तब्बल 5 हजार रुपयांची वाढ झाली आहे. सध्या लग्नसराईचा हंगाम सुरू असून यामध्ये लोक मोठय़ा प्रमाणात सोन्या चांदीची खरेदी करतात. अशातच गेल्या काही दिवसांपासून सोने-चांदीच्या दरात मोठी वाढ झाली. नवीन आर्थिक वर्षाच्या पहिल्या दिवशी म्हणजेच 1 एप्रिलला सोन्याच्या दराने 69 हजार रुपयांची पातळी गाठली. त्या तुलनेत बुधवारी सोन्याचे दर 72 हजार रुपयांवर पोहोचले. त्यामुळे सोने खरेदीदारांना मोठा फटका बसतोय.
