अलिबागच्या जिल्हा कारागृहातील कैद्यांना आता थेट घरी फोन करता येणार आहे. यासाठी तुरुंगात स्मार्ट कार्डवर चालणाऱ्या अँलन फोनची सुविधा उपलब्ध करून दिली जाणार आहे. या फोनद्वारे कैद्यांना आठवड्यातून तीन वेळा दहा मिनिटे फोन करून आईवडील, पत्नीसह नातेवाईकांची ख्यालीखुशाली विचारता येणार आहे. अलिबाग येथील जिल्हा मध्यवर्ती कार्यालयात नुकताच या सुविधेचा शुभारंभ करण्यात आला असून 200 कैद्यांना या सुविधेचा फायदा होणार आहे.
तुरुंगामध्ये पूर्वी कॉइन बॉक्सची सुविधा उपलब्ध असायची. मात्र या कॉइन बॉक्समध्ये वारंवार बिघाड होऊ लागले. कॉइन बॉक्स फोनची दुरुस्ती कठीण होत गेली. त्यातच नवीन कॉइन बॉक्स फोनही उपलब्ध होत नव्हते. त्यामुळे स्मार्ट कार्डवर चालणाऱ्या अँलन फोनचा पर्याय कैद्यांना उपलब्ध करून देण्यात आला आहे. तामीळनाडू येथील कंपनीने या फोनची निर्मिती केली आहे, कैद्यांना आठवड्यातून तीन वेळा आपल्या कुटुंबीयांशी दहा मिनिटे याद्वारे बोलता येणार आहे. यामुळे कैद्यांचा मानसिक ताण कमी होईल, असा विश्वास व्यक्त केला जात आहे.
बंदीवानांना स्मार्ट कार्डचे वाटप
अलिबाग मध्यवर्ती कारागृहात या सुविधेचा शुभारंभ करण्यात आला. बंदीवानांना स्मार्ट कार्डचे वाटप करण्यात आले आहे. यावेळी कारागृह अधीक्षक अशोक कारकर, वरिष्ठ तुरुंग अधिकारी रामचंद्र रणनवरे, निरीक्षक शशिकांत निकम, महेश पोरे उपस्थित होते. या सुविधेची तांत्रिक बाजू कर्मचारी योगेश राठोड आणि अनिकेत कातमाने हे सांभाळणार आहेत.
■ राज्यभरात कॉइन बॉक्स सुविधा हद्दपार झाल्यानंतर आता अँलन फोन सुविधा उपलब्ध करून दिली जाणार आहे. सुरुवातीला प्रायोगिक तत्त्वावर ही सुविधा पुण्यातील येरवडा तुरुंगात राबवण्यात आली होती.
■ अँलन फोनच्या सुविधेस चांगला प्रतिसाद मिळाल्यानंतर अतिरिक्त पोलीस महासंचालक आणि तुरुंग प्रशासन महानिरीक्षकांनी राज्यभरात ही सुविधा उपलब्ध करून देण्याचा निर्णय घेतला आहे. स्मार्ट कार्डच्या माध्यमातून हा फोन कैद्यांना वापरता येणार आहे.
■ जिल्हा मध्यवर्ती कारागृहात गेल्या काही वर्षांत कैद्यांना चांगल्या सुविधा उपलब्ध करून देण्यात आल्या आहेत. कैद्यांना पूर्वी हाताने कपडे धुवावे लागत होते. आता कपडे धुण्यासाठी उच्च क्षमतेच्या मशिन्स उपलब्ध करून देण्यात आल्या आहेत.
■ कारागृहाच्या पाकगृहात पोळ्या बनवण्यासाठी मशीन उपलब्ध करून देण्यात आले आहे. शुद्ध पाण्याचा पुरवठा व्हावा यासाठी आरओ जलशुद्धीकरण यंत्र बसवण्यात आले आहे. शिजलेले अन्न ठेवण्यासाठी हॉट पॉट सुविधाही देण्यात आली आहे
